سوال: عبادت کیا ہے ، کیا صرف نماز ، روزہ ہی عبادت ہے ، یا ربِّ کریم کی رِضا کے لیے کیا گیا ہر اچھا کام عبادت ہے ؟
جواب: مفسرِ قرآن ، حکیم الامت حضرت علامہ مولانا مفتی احمد یار خان نعیمی رحمۃ اللہ علیہ نے اپنی کتاب علم القرآن ، کے صفحہ 104 سے صفحہ111 (مطبوعہ مکتبۃ المدینہ)پر عبادت کے معانی و مفہوم اور قسموں کا بیان فرمایا ہے ، جس کا خلاصہ یہ ہے کہ عبادت قرآن شریف کی اصطلاحوں میں بہت اہم اور نازک اصطلاح ہے ۔ عبادت بہت طر ح کی ہوتی ہے ، جانی ، مالی ، بدنی ، وقتی وغیرہ مگر اس کی بنیادی طور پر دو قسمیں ہیں :
ایک وہ جس کا تعلق براہِ راست اللہ کریم سے ہو ، کسی بندے سے نہ ہو ۔ جیسے نماز ، روزہ ، حج ، زکوۃ ، جہاد وغیرہ کہ بندہ ان کاموں سے صرف ربِّ کریم کو راضی کرنے کی نیت کرتا ہے ، بندے کی رضا کا اس میں دخل نہیں ہوتا ۔
دوسری قسم وہ جس کا تعلق بندے سے بھی ہے اور ربِّ کریم سے بھی ، یعنی جن بندوں کی اطاعت کا اللہ پاک نے حکم دیا ہے ، خدا کو راضی کرنے کے لیے ان کی اطاعت کرنا، رب تعالی کی عبادت ہے۔ جیسے والدین کی فرمانبرداری ، مرشد و استاد کی خوشی ، نبی پاک صلی اللہ علیہ والہ وسلم پر درود شریف پڑھنا ، رشتہ داروں کے حقوق ادا کرنا ، غرضیکہ کوئی بھی جائز کام ہو ، اگر اس میں اللہ پاک کو راضی کرنے کی نیت کر لی جائے ، تو وہ اللہ کریم کی عبادت بن جاتے ہیں اور ان پر ثواب ملتا ہے ، حتی کہ جو اپنے بیوی بچو ں کو کما کر اس لیے کھلائے کہ یہ سنتِ رسول صلی اللہ علیہ والہ وسلم ہے، اللہ پاک اس سے راضی ہوتا ہے ، تو کمانا بھی عبادت ہے اور جو خدا کا رزق اس لیے کھائے کہ ربِّ کریم کا حکم ہے : ﴿ کُلُوْا وَاشْرَبُوْا ﴾ اور حضو رصلی اللہ علیہ والہ وسلم کی سنت ہے ،فرائض و واجبات ادا کرنے کا ذریعہ ہے ، تو کھانا بھی عبادت ہے ۔ اسی لیے مجاہد فی سبیل اللہ غازی کا کھانا ، پینا ، سونا، جاگنا عبادت ہے بلکہ ان کے گھوڑوں کی رفتار بھی عبادت ہے۔ لہٰذا ماں باپ کو راضی کرنا ، ان کی اطاعت کرنا ، ربِّ کریم کی عبادت ہے ، نبی صلی اللہ علیہ والہ وسلم پر جان ومال قر بان کرنا اُس سرکار کی اطاعت اور اللہ پاک کی عبادت بلکہ اعلیٰ ترین عبادت ہے ۔
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم
